ព្រះសីហនុ៖ មន្ទីរប្រឆាំងគ្រឿងញៀន សហការជាមួយស្នងការដ្ឋាននគរបាលខេត្តព្រះសីហនុចុះបង្រ្កាបទីតាំងផលិតខុសច្បាប់នូវសារធាតុញៀនចំនួន ២ទីតាំងក្នុងខេត្ត និងចាប់បានជនសង្ស័យជាជនជាតិចិនតៃវ៉ាន់ ចំនួន ៦នាក់ផងដែរ។

យោងតាមការចុះផ្សាយរបស់អគ្គស្នងការនគរបាលជាតិ ប្រតិបត្តិការណ៍នេះធ្វើឡើងកាលពីថ្ងៃទី២៩ ខែមិថុនា វេលាម៉ោង៣រសៀល នៅចំណុចឃ្លាំងលើ ស្ថិតក្នុងភូមិ៣ សង្កាត់លេខ៣ ក្រុង-ខេត្តព្រះសីហនុ និងនៅភូមិស្ទឹងឆាយខាងត្បូង ឃុំស្ទឹងឆាយ ស្រុកកំពង់សីលា ខេត្តព្រះសីហនុ។

សមត្ថកិច្ចក៏ចាប់បានជនសង្ស័យ ៦នាក់ជាជនជាតិចិនតៃវ៉ាន់ ដែលមានអាយុពី ៣៥ឆ្នាំដល់ ៥១ឆ្នាំ ជាមួយនឹងវត្ថុតាង សារធាតុគីមី និងគីមីផ្សំចំនួន ១៤តោន និង១៦០គីឡូក្រាម ឧបករណ៍សម្ភារកែច្នៃផលិតរួមមាន ឆ្នាំងប្រតិកម្មចំនួន ៥០គ្រឿង កែវប្រតិកម្មចំនួន ៧គ្រឿង ម៉ាស៊ីនភ្លើងចំនួន ៣គ្រឿង ជើងទម្រធុប្រតិកម្មចំនួន ៥៩គ្រឿង កញ្រ្ចែងមួយចំនួន ម៉ាស៊ីនប្រតិកម្មចំនួន ៥គ្រឿង ធុងមួយចំនួន ជីឡៅចំនួន ១០ជីឡៅ ម៉ូទ័រក្រឡុកចំនួន ១គ្រឿង និងសំបកធុង ២៩៨សំបក។

បច្ចុប្បន្នជនសង្ស័យ ព្រមទាំងវត្ថុតាងចាប់យកខាងលើ បានកសាងសំណុំរឿងបញ្ជូនទៅសាលាដំបូងខេត្តព្រះសីហនុ ចាត់ការបន្តតាមនីតិវិធី៕

^{រូបភាព៖ នគរបាលជាតិ}